Notiziak

Euskadiko 30 baserrik heuren ateak zabalduko dituzte Uztailak 8 eta 9an ONGI ETORRI BASERRIRA! Ekimenaren 7. edizioan

 

Bisitariek aukera anitza izango dute eskura, betiko baserria bisitatzetik egurrez egindako bizikletak nola egiten diren ikusteraino

 

Baserri mundua eta hiriaren arteko zubigintza lanak egiteko asmoz, orain 8 urte, 2014 urtean, ENBA sindikatuak Gipuzkoako 8 baserrietako ateak zabaltzea erabaki zuen, etxeko ateak zabalduaz, ekoizle eta kontsumitzaileenganako harremana sendotu eta estutu nahiean, honenbestez, NIREA ekimenean atxikia da. Bestalde, bertako elikagaien kontsumoa sustatzeko, Eusko Jaurlaritzak HAZI bitartez, talde bakoitzean, elikagai otarra zozketatuko da.

Aurtengoan, COVID pandemiaren ondorioz 2 urteetako etena ostean, ONGI ETORRI BASERRIRA ekimenaren zazpigarren edizioarekin gatoz, gure jakien jatorria berraurkitzeko eta beren ingurune naturalean, mahaiean dastatzen ditugun elikagaiak ekoizten dituzten baserritarrak ezagutzeko aukera ezinhobea eskeiniz.

Uztailak 8 eta 9an, Gipuzkoa eta Bizkaiko 30 baserritarrek heuren baserrietako ateak zabalduko dituzte beren ikuiluak, baratzak eta landaguneak ezagutzera emateko.

ONGI ETORRI BASERRIRA ekimena, antolatzailea den sindikatuaren ustean, bertako elikagaien aldeko apustu garbia da, landaguneari balorea emateko, barnekaldeko zonaldetako turismoa sustatzeko eta nola ez, gure herri gastronomia goratzeko.

Familian edo lagunartean egiteko bisita zoragarriak jartzen dugu denon esku.

 

ONGI ETORRI BASERRIRA! 2022ko Informazio osoa

2022.05.18.ordizia.aralar

Maiatzaren 10ean Ordizia, Zaldibia, Legorreta eta Amezketako udal ordezkariek eman zuten prentsaurrekoan adierazitakoaren aurrean, Abaltzisketa, Altzaga, Arama, Beasain, Gaintza eta Lazkaoko ordezkariek eta abeltzainen ordezkari den ENBA sindikatuak honako hau adierazi nahi dugu:

 

1. Maiatzaren 10eko prentsaurreko hartan Ordizia, Zaldibia, Legorreta eta Amezketako udal ordezkariek Enirio Aralar Mankomunitatearen izenean hitz egiten ari zirela azaldu zuten. Baina egiari zor, beraiek Mankomunitate horren zati bat baino ez dira. Mankomunitatearen izenean hitz egiteko, Mankomunitateko batzordean hitz egin eta adostu behar da. Gu ere Mankomunitatea gara eta Mankomunitateko Lehendakari den Adur Ezenarro jaunak, ez du Mankomunitateko bilerarik deitu azken hamar hilabete hauetan.

 

2. Gipuzkoako herri mendi guztiak, 32 guztira, herri mendiaren jabetza duten erakunde eta Gipuzkoako Foru Aldundiaren arteko adostasun bitartez kudeatzen dira, GOILARRE izeneko programa bitartez. Programa horren oinarrian, herri mendiaren jabe den erakunde eta herri mendiaren erabiltzaileak diren abeltzainen arteko adostasuna dago eta hori da, Enirio-Aralarko mendian falta dena, mendiaren jabetza duen Enirio-Aralar Mankomunitatea eta abeltzainen arteko akordioa. Mankomunitateak, abeltzainen ustean, ez bait du abeltzainen aldetik finkatutako lehentasunak gauzatzeko inongo asmorik, hala nola, xehaketak, bideak eta txaboletako inbertsioak. Adostasuna faltaren aurrean, hau da, abeltzainen oneritzirik gabe, ez da gauzatzen jabea den erakunde eta Foru Aldundiaren arteko akordiorik. Beraz, kanpora begira jarri baino lehen, mendira begira jarri beharko luke Mankomunitateak eta abeltzainekin adostasunera iritsi.

 

3. Salagarria da, diru kontuekin egin duten manipulazioa. Gezurra da, Aldundiaren gabezia estaltzeko, udalok, diru “extra” bat jarri behar izan degula esaten dutenean. Udalok, GOILARRE programan parte hartuz, eta Aldundiko dirulaguntzekin batera efektu biderkatzaile bat lortzeko, diru gehigarri bat jartzeko erabakia hartu genuen. Diru hori abeltzainekin eta Aldundiarekin adostutako lanak egitera bideratua zegoen. Adur Ezenarro izan zen, bere kabuz, diru hori beste ekintzetara desbideratu zuena, Aldundiarekiko eta abeltzainekiko konpromisoak hautsiz.

 

ARALARko abeltzainok ez dugu Maiatzaren 1eko “maskaradan” parte hartuko

MENDIKO ABELTZAINTZA, egun bateko jaiaz haratago, URTE OSOAN BABESTU BEHAR DA

 

2022.04.28

 

Igandean, Maiatzak 1, Aralarko larretokien irekiera ospatuko da ofizialki. Ofizialki diogu, mendira azienda igo eta, bertan lanegin eta bizi garen abeltzainok ezer gutxi dugulako ospatzeko.

 

Ofizialki diogu ere, mendiaren ardura nagusia duen Enirio-Aralar Mankomunitateak urte osoan egiten ez duena, egun bateko ospakizunarekin izkutatu eta zuritu nahi duelako eta gizarte osoaren aurrean, normaltasun itxura gorde asmo duelako.

 

Geuk, Enirio-Aralarreko mendiko erabiltzaileok, abeltzainok alegia, ez gaude prest maskarada honetan partehartzeko, ez baitugu Enirio-Aralar Mankomunitatearen axolagabekeriaren konplize izan nahi eta honenbestez, Goierri eta Gipuzkoako gizarte osoari ozen azaldu nahi diegu, mendiko abeltzainok ez dugula igande honetako festan partehartuko eta, honenbestez, ez dugula ganadurik eramango.

 

Abeltzainok ere festa eta alaitasuna maite dugu eta prest geundeke, gurekin, urte osoan elkarlanean jardun direnekin festan ibiltzeko. Aldiz, urte osoan egin ez dena, ezin zuritu egun bateko festarekin eta are gehiago, ez dugu zuritu nahi.

 

Mendian jarduten garen abeltzainok errespetua eta duintasuna aldarrikatzen dugu. Errespetua, mendiko abeltzaintza egiten dugun baserritarrontzat eta gure ogibiderako. Duintasuna, baliabideak eta azpiegiturak, gure jarduerarako.

 

Beraz, amaitzeko argi eta ozen diogu: MENDIKO ABELTZAINTZA, egun bateko jaiaz haratago, URTE OSOAN BABESTU BEHAR DA

 

 

 

 

ARALARko ABELTZAINAK – ENBA – EHNE

 

2022.05.15.instagBaserritarrok, Ixidro deunaren jaia ospatuko dugu igandean, zentzu erlijiosoaz haratago, gure ogibideaz eta bizimoduaz harro gaudelako eta honenbestez, zaliltasunak zailtasun, eguna ospatu nahi dugulako.

Baserritarrok harro gaude egiten dugun lanaz, bizi garen gizarte osorako elikagai osasuntsuak eta kalitate gorenekoak ekoiztearekin batera, zentzu ekonomikoaz haratago, basoak, ingurumena eta lurraldea kudeatzen ditugulako, beti ere, gizarte osoaren onurarako.

Honenbestez, elikadurak zein garrantzitsua den, pandemia garaian nabarmen geratu dela ikusiaz, elikadura jasangarria eta elikadura burujabetzaren arloan betetzen dugun funtzioaz harro gaudela azpimarratu nahi dugu Ixidro deunaren jaiaren atarian.

Bide batez, elikagaiak eta egurra ekoiztean gure herriaren lurraldea eta paisaia zaintzeko egiten dugun lana jarri nahiko genuke balioan ere, klima larrialdiaren aurkako aktiboak garela azpimarratuz.

Azkenik, elikaduraren atalean eta ingurumearen atalean egiten ditugun lanak bai geuretzako bai gizarte osorako direla kontua hartuz, gizarte osoaren babesa eta aitortza aldarrikatu nahi dugu.

2022/04/01.- Euskal Herrian ez dugu haragirik izango honek horrela jarraitzen badu! Ekoizpen sektore bat gehiago daukagu hil edo biziko egoeran. Haragia ekoizteko beharrezko diren kostuak etengabe igotzen ari dira jada urte eta erditik ona, eta beti bezala, baserritarren jasotzen duten prezioa zentimo gutxi batzutan mugitu da.

30 urte baino gehiago daramatzagu prezio ia berdinetan lanean, guk ordaindu beharreko lehengaien eta energiaren prezioa bortizki goraka joan den bitartean. Honela ezin daiteke lanean segi!

Atzerrian ere aitortutako kalitateko haragia da guk ekoizten duguna, baina ez dugu inolaz ere zor zaigun preziorik ordaintzen. Zerealen prezioaren %80ko igoera baten aurrean gaude, txahal gizenketan berebiziko garrantzia dutenak, eta hauek eutsi behar diote beste guztiaren gorakada.

Haragiaren zikloa hasieratik bukaerara ulertu behar da. Gure herrian hain sustraituta dauden larre behietatik sortzen dira txahalak. Behi hauek dira gure belardi eta mendi larreak mantendu, ongarritu eta garbitzen dituztenak. Basa animaliek beste lurralde batzuetan bezalaxe, ekosistemak, flora eta fauna zaintzen dutenak. Behi hauek, eta hauekin lan egiten duten abeltzainak dira elkarlan egiten dutenak!

Txahal hauek dira ondoren, gizendu eta kalitate eta zapore bikainez gure platerean gozatzen ditugunak, zikloa itxiz, bideragarri eginez gurpila. Edo ez? Gaur salatu nahi dugun egoeran inolaz ere ez! 

Espainiar estatu guztian txahal haragiaren prezioa izaten ari den gorakada izugarria haragi faltak eta ekoizpen kostuen gorakadak bultzatua da. Lotsagarria da, izan ere, euskal abeltzainoi estatuan baino merkeago ordaintzen ari zaizkigu txahala, eta hori, kalitatezko marka potente bat dagoenik, Euskal Okela, teorian bertako produktuaren alde lanean ari den distribuzioa dagoenik, eta sentsibilizatutako kontsumitzailea dagoenik, estatuko beste lurralde batzuetan baino eros ahalmen handiagoa duena.

Dei egin nahi diegu bertako okela erosten duten haragiaren kateko eragileei, TXAHALAREN PREZIOA EGOKI DEZATEN BEHAR DEN NEURRIRA, izan ere, gaurko kostuekin gutxieneko prezioa ia 6 €/kanal kilo inguruan beharko bailuke, baserritarrek bertan ekoiztu eta bertan saltzen jarraitzea nahi badute, bederen.

EHNE eta ENBA nekazal sindikatuok deia luzatu nahi diegu ere abeltzain denei, handiago nahiz txikiago, erabateko jarduneko edo ez, beren txahalen prezioa defenda dezaten! Nahikoa da gehiegikeriez! Eta halaber jakinarazi, txahalen bidalketak antolatzen hasiko garela hemendik kanpora, bertan ez badute gure produktua, gure haragia balio duen adinako balorean jarri nahi, guri soldata galaraziz, maiteago gaituzten beste merkatu batzuetara eramango ditugulako. Jarri gurekin harremanetan, ez oparitu horrenbeste lan eta esfortzu kostatu zaizun hori!

Ez dugunean, oroitzen gara geneukanaz, eta hemen ere erreakzio azkar eta irmoa ematen ez bada, Euskal Okela eta bertako haragia, historia izatera pasako da.

ORDAINDU BASERRITARROI ZOR ZAIGUNA!